பாத்திரம்

மீண்டும் மீண்டும் குலுக்குகிறபோதும்

சன்னமாகவே இருக்கும் சில்லறைத் தட்டை

உதாசினிக்கும் பொருட்டு

எதேச்சையாய் நடந்துவரும் சிறுமியை நோக்கி நீட்டுகிறான்

திகைத்தவள் பின் சமாளித்து

புன்னகையித்து ஒதுங்கிச் செல்கிறாள் 

இப்போது 

மருண்ட விழிகள் ஒருமுறை

சிறு புன்னகை ஒருமுறை

பாவாடையில் படபடத்தப் பூக்கள் ஒருமுறை

தூரச் சென்று வீசிய பார்வை ஒருமுறை என 

சிலிர்த்துக்கொண்டிருந்தது

அடுத்தடுத்த முறைகளில் தட்டு.

-இயற்கைசிவம்